香港式荒誕劇場
「荒誕」在我們身邊如細菌般無處不在，面對荒誕的社會、荒誕的人生，你會選擇無視它、接受它、逃避它、擁抱它、吃掉它、擊倒它還是……？
今年3至5月，與Free-To-Play 一起探討「小丑 x 荒誕」（Clown in Absurd）的時代精神，讓我們學習小丑般，懷著屢敗屢戰的志氣，成為一朵在石屎裂縫中奇蹟生長的溫柔小花，重新定義荒誕和存在的意義。
為咗推廣「小丑無罪 荒誕有理」嘅概念，今年3至5月，懶係西化嘅 Free-To-Play 將會搞一系列活動，同大家吹吹水搞笑，分享「小丑 x 荒誕」的時代精神，系列活動包括線上讀劇、小丑工作坊、展演同埋分享會。
【第一擊】肯定你睇到懷疑人生嘅尤涅斯科經典作品《椅子》（選段）線上讀劇遊樂會
為咗令呢套九唔搭八嘅劇，再提升一個層次，我哋搵埋比利時嘅藝術家，認真咁同大家演繹一次咩叫做雞同鴨講：一個劇本，用廣東話、英語同法語共同演繹，欣賞唔同語言的語感之餘，笑下當中嘅莫名其妙，仲可以認真諗下由唔同語言翻譯出黎嘅劇本，究竟會唔會影響原本嘅韻味？翻譯之後，仲夠唔夠好笑，夠唔夠荒謬？。放心，我哋都驚冇人敢參加，所以，係劇本選段，選段嚟姐。到時仲有遊戲玩添，集體式快問快答，希望大家爆發出無厘頭嘅小宇宙，如果你怕醜，响隔離食花生都～得～
線上讀劇遊樂會係「香港式荒誕劇場」嘅前奏，比有興趣嘅人士初步認識「小丑 x 荒誕」嘅概念。如果意猶未盡，仲可以參加4-5月舉辦嘅【第二擊】「這個小丑不可笑」工作坊。
尤涅斯科《椅子》大綱：
故事講述一對老夫妻住在被死水包圍的荒島上。老夫妻的生活毫無意義，但老公公有一個重要信息想要告訴世人，於是，他們排除萬難想邀請所有具影響力和代表性的人物來旁聽老公公的演說。最終，拯救了他們的是想像力、空氣中的勇氣及一張小板凳。
Stage Clown 探索係表演者响訓練路上好重要嘅一環，能夠幫助表演者擴展想像、面對自己內心、勇於作出冒險嘅選擇，並且發掘自己更傻更瘋狂嘅一面，讓豐富嘅生命力同驚喜注入表演之中，令人眼前一亮。
「這個小丑不可笑」工作坊內容圍繞六大主題：觀眾與存在感 ( Audience & Presence )、突破框框的形體 ( Abstract Movement )、氣氛與情景 ( Atmosphere & Situation )、發聲與節奏 ( Sound & Rhythm )、文字與語言 ( Words & Language )、即興與小品 ( Duets & Improvisation )。
相同主題嘅工作坊同期亦會响比利時進行，工作坊會安排香港學員同比利時學員線上交流，互相學習、分享所想。
工作坊最後會以公開展演作結，究竟學員會選擇最「make sense」 定係最「non-sense」 嘅素材放入佢哋嘅演出？就等我哋拭目以待！
