簡介
你，仲相信英雄？
古語有云：「欲成為英雄者，中二病也。」即使我哋唔再信「人人都可以成為英雄」，但係由遠古神話傳說，到當今電影漫畫作品，人似乎都離唔開英雄。呢個概念好似已經扎根咗喺我哋心入面，唔通，我哋最愛嘅係英雄而唔係Holiday？！
一個冇超能力只有熱血嘅導演黃朗然，集結咗一班伙伴，誓要搵返依舊相信英雄嘅自己，並以集體創作（Devising）開展「成為英雄嘅預演綵排」！佢哋參（抄）考影視作品嘅「虛構英雄」、搜羅各地嘅「真實英雄」、喚醒中二病之魂發掘「日常英雄」⋯⋯仲有，仔細量度（用間尺）自己同英雄嘅距離——點解「佢」係「英雄」而唔係「神」？係「英雄」而唔係「平凡人」？「你」有冇做過英雄？「你」有冇俾人叫過「英雄」？
喺呢個時代，「我」係咪都有機會成為英雄？
喺呢個時代，仲需唔需要「我」成為英雄？
帶住呢啲問題，呢班「英雄」將會用幾個喼裝晒所有用具，挑戰用行李箱劇場 (Suitcase Theatre) 嘅方式喺世界各地傳教，將佢哋研發嘅英雄獨門育成秘笈揚威海外，流芳百世世世世世⋯⋯（回音）
到底係蝦碌醜態盡出，定係柒到盡頭便是型？不如一齊試吓衝咗先算，做咗先講！
__________________
- 粵語演出，不設劃位
- 演出全長約90分鐘，不設中場休息，遲到者待適當時候方可進場
- 本節目涉及閃光、巨響及煙霧效果，敬請留意
- 所有場次均設演後談
- 如遇特殊情況，主辦機構保留更改節目及表演者的權利
- 是次演出設有經濟特惠票，如有特別需要，歡迎聯絡我們（電郵 hero.project2325@gmail.com）了解更多
- 有關演出更多資訊，可瀏覽Instagram @hero_oreh24