簡介
舊物市集 ︳回憶體驗 ︳創作者分享
可能好多人都唔明，點解有啲人要花上咁多空間、時間、甚至係金錢去收集舊物，的確喺呢個提倡斷拾離嘅年代，我哋呢班鍾意儲舊嘢嘅人，好似有啲格格不入。
但其實好多儲舊嘢嘅人，除咗係自己嘅喜好之外，更加係想透過收集唔同嘅舊物，實實在在地捉住一啲回憶，那怕係一張紙，一件物品，蘊含住嘅，可能係構建我城嘅某一個片段，亦可能係我哋生活喺呢個地方嘅一啲小片段，將實物攞上手嘅溫度，質感，有時唔係一個個數碼檔案可以取代到。
喺呢個嚟得快又去得快嘅世代，有啲嘢，一個唔小心就會被遺忘，回憶呢家嘢，仿似實在但又有啲虛無。
今次嘅市集，各個參與單位將會為大家帶來唔同年代嘅舊記憶，同時亦邀請咗幾位重量級嘉賓同大家坐低傾吓偈，佢哋都有一個共通點，就係仍然好努力地，分別用唔同嘅方式嚟「記住香港」。
呢期好多人喺Threads玩緊人生回顧，不如又試吓過嚟年華市集，用一個實在啲嘅方式去搵返一啲舊時嘅回憶，更多詳情，想知再講。